حوار مع حمار

استنكار حمار :كان لابد بعد ان انتشر ذبح الحمير وبيعها فى الأسواق بمختلف طرق التصنيع او سليمه وصحيحه وتفرح القلب الحزين علشان ليس عليها كبسات من التموين واسعار حاجة ببلاش كده والشعار الذى رفعوه تجار هذا الصنف " كل وخلى الغلابة تعيش " فرأيت انه لابد مما ليس منه بد ان أذهب الى احد الحمير واتحاور معه

انا : اسمح لى اتحاور معك - قد اتجاوز حدودى 00 ولكن صدقنى ياصاحبى يجب ان يكون هذا الحديث فى الصميم ولتوضيح جميع الجوانب الحيوانية من مغذى ذبحكم وبيعكم بهذه الأسعار ولماذا واشمعنى لحمكم يباع بالرخيص بالرغم ان هناك اصناف كتيرة اخرى من اللحوم ،

وبكل رقة وأدب رد الحمار : اولا احنا حظنا قليل مع البنى ادمين والوحيد اللى كان له شأن بين الحمير كان حمار الحكيم وقلنا ساعة ماقرأنا القصة اننا قربنا جدا من البنى آدمين اتاريهم مبيتين النيه على ان يبيعوا فينا ويشتروا بالرخيص

انا : معذرة سؤال على الماشى ياترى لحمكم هل فيه ضرر على بنى الانسان؟؟

ثار واربد الحمار ورفص ونهق و لدهشتى الشديدة من رد فعله على السؤال الذى كنت اسأله سؤال برىء ليس فيه اى اهانه وجلست استمع الى حديثه الذى افحمنى واقحمنى فى دهاليز السياسة واللى طول عمرى باخاف اقرب منها

الحمار : اشمعنى بتدورى دلوقتى على اللحمه اللى فيها ضرر لكم واللى ما فيهاش 00 يعنى اللحمةالمستوردة اللى قاعدين تطفحوها بقالكم سنين دى مش مضرة ولحمى انا بس اللى ممكن يكون ضار طيب والخضار المليان مبيدات والناس اللى مرمية فى المستشفيات من اشى سرطانات واشى كبد و000 و00

وبصراحه ياجماعه لقيته مثقف اكتر منى بكتير لانه ذكر لى صف طويل من الأمراض والتى هى من أسبابها الطعام الذى نلتهمه والهواء الذى نستنشقه والماء الذى نشربه وفجأة لقيته بيقول -

غريبه اشمعنى النهارده اللى بتسألوا عن اضرار لحمى ما طول عمر الناس بترمى الحمير النافقة مننا فى النيل اللى بر مصر كله يتشرب منه يعنى قبل ما تاكلوه لحمه شربتوها شوربة اقصد من النيل يمكن هو ده السبب انكم اصبحتم بهذه البلاده ومافيش حد فيكم بينطق

انا 00عيب ياحمار يعنى ايه مافيش حد بينطق مننا وعندنا بلاده

الحمار : تصدقى يمكن لما تاكلوا لحمى ويسرى كده فى جتتكم اللى مش محوق فيها دى - تتعلموا الرفص والرفض والنهيق وصوتكم يوصل للمسئولين ، اللى لسة قاعدين بيفكروافى حل مشكلة العيش وطوابيره والمكرونه اللى اصبحت طعام الموسرين والارز الذى اصبحتم بتشاوروا عليه من بعيد والخضار00 يالهوى (ده الحمار) حد يصدق كيلو الفاصوليا الخضراء اللى كانت برخص التراب بقى ب 8 جنيه ومافيش صنف واحد اقل من 4 جنيه وبعدين يطلع واحد فخيم كده فى البرامج ويقول حققنا فائض وحققنا 00 وأنجزنا - تصدقى

انا ياحمار مش عارفه انت عرفت تحسبها ازاى وقلت اكيد ده كله كلام فى الهوى والا زى ما بيقولوا طق حنك

الحمار : تعرفى انا كل يوم وانا فايت على عم احمد بتاع الجرايد هوايتى انى ابص فى الصور التى تتصدر الصحيفة - ابص الاقى اخوانا دول كل صورهم منوره الجرايد وبيضحكوا والضحكة واصله من هنا الى هنا واقول يبقى كل مشاكل البلد اتحلت اسيب الجرايد وامشى فى الشارع الاقى الناس بتكلم نفسها - وكله مكشر ومبوذ -تعرفى انا حصلى منكم انفصام فى الشخصية الحومرية اقصد الرفسية 00 لا فى المحورية وسألت نفسى طيب دول بيضحكوا على ايه ودول زعلانين من ايه - واخيرا توصلت الى ان الناس اللى بتضحك فى الجرايد دى ضحكوا على الناس المبوذه دى

ولم استكمل حديثى معه نظراً لضيق الوقت كى الحق دورى فى طابور العيش وأستأذنت على امل لقاء متجدد مع حمار اخر لاستزيد من خبراته وارائه 00والى لقاء